متى يحس الزوج بقيمة زوجته؟
تعبانة، وطالعة روحي من تصرفات زوجي معي، زوجي ما يحس بقيمتي ولا بقيمة أي شيء أسويه له، فمتى يحس الزوج بقيمة زوجته؟ متى؟
أريد أفهم هو ليش الرجل المتزوج ما يقدر يحس بزوجته أبدا؟ ليش في نظره الزوجة ما لها قيمة وأي وحدة ثانية تمشي في الشارع يشوفها أحلى وأهم من زوجته حتى لو كانت زوجته ملكة جمال؟ ليش الزوج يجحد كل شيء تسويه زوجته له؟ ليش يشوفها أقل منه أو يستصغر أفعالها مهما كان تضحياتها ؟
تعبت تعبت
أنا متزوجه من 11 سنه وما خليت شيء إلا وسويته له عشان أرضيه، لكن كل شيء أسويه ما له قيمة عنده وكل شيء أسويه غير مهم، يعني طول الوقت يمدح ويثنى على طبخ مرة أخوه، مع إن طبخي ألذ بشهادة الجميع حتى مرة أخوه تقول قدامه إنها تتعلم مني!!! لكن دايم يحب يقهرني ويمدح طبخها علنا ويذم في طبخي ولا يستحي على وجهه، مو سوالف يقصد يقهرني والكل ملاحظ عليه.
وإذا شريت ملابس جديدة ألبسها قدام أهلوه في البيت، يقول لي ملابس مو حلوة وذوقي مو حلو، لكن إذا شاف أخته أو وحدة من زوجات أخوانه، لابسه نفس الطقم يقولي ليه ما شريتي مثله، أقول له بلا شريت ولبسته وأنت عييت وقلت لي أبدله لانه ما عاجبك، قال لا مو مثله أكيد فيه فرق!!!!
بعدين إذا جت أخته تزورنا وشافها كيف تعامل عيالها، يقول لي ليش أنت مو راقية وماعندك أسلوب في معاملة الأطفال مثلها، وإذا سمع إن واحد من ربعه زوجته مسوية له حفلة أو جايبتله هدية، يقول شوفي الزوجات كيف يدلعون أزواجهم، مو مثلك 😤، وأنا أصلا من وين أدلعه يعني أساسا ما عندي فلوس، هو ياخذ كل راتبي أول بأول، وما يعطيني منه إلا بالقطارة.
وإذا طلعنا السوق يقعد يناظر على البنات، ويتأمل فيهن ثم يلتفت لي ويقول فرق كبير
يقصد يعني إنهن أجمل مني، ومرات يقولي ليه أنت عيونك صغيرة؟ ليه أنت خدودك مو حمراء؟ أقول له هالبنات حاطين مكياج وأنت ما تخليني احط مكياج يقول لا هذولي البنات جمالهن رباني، وأنت تقولين مكياج من الحقد والحسد اللي تارس قلبك عليهن، إذا صرت أنا حسودة فالسبب طبعا مقارناته
قبل أتزوج منه عمري ما قارنت بيني وبين أحد، طول عمري راضية وقانعة بحالي وعندي ثقة في نفسي، ما كنت أساسا أحس بأي فرق بيني وبين غيري، لأني أشوف كل إنسان عنده عيوبه وعنده مميزاته، لكن من يوم خذته وأنا تغيرت صرت فعلا حسودة، بس هذا موطبعي هذا الإحساس بالنقص اللي هو حطه فيني
تعبت تعبت
أقول ليه تزوجت ليه ما جلست في بيت أهلي عانس، على الأقل أسلم من المقارنات اللي هدت حيلي، ويابت نفسيتي الأرض ودمرت معنوياتي، ما عاد عندي ثقة في نفسي يا خواتي صدق خلاص تعبت تعبت