تعديل درجات بدون علمي

 "تعديل درجات بدون علمي... وأنا أتحمل المسؤولية!"

السلام عليكم ورحمة الله وبركاته،
أنا معلمة، وعندي مشكلة صارت بالفصل الثالث، وحبيت أطرحها لأن الموضوع يمس مهنيتي وضميري.

في البداية، زميلة لي كانت تدرس مادة معينة بداية الترم، درست تقريبًا 3 أسابيع، بعدها راحت بندب لمدرسة ثانية. إدارتنا حولت المادة لي، وفعلاً بدأت أشرح من الدرس الثاني، وكنت في الأصل أدرّس الطالبات مادة ثانية، فعارفة مستواهم تمامًا.

لاحظت إهمال كبير من الطالبات وعدم مذاكرة، مع إن المادة "تقويم مستمر". كملت شرح، وأنهيت المنهج ورصدت الدرجات بناء على الأداء الفعلي، وعطيت كل طالبة حقها وزدتهم 10 درجات كمراعاة، وكنت أمينة جدًا في التقييم.

جاءت زميلتي ترجع بعد ختم المنهج، قلت لها تراجعين بس الدرجات، عطيتها برنت وقلت تأكدي ما فيه خطأ. صرت كل يوم أسألها: راجعتي؟ تقول لا.

وبدون ما ترجع لي، راحت وعدلت درجات ست طالبات. زادت درجاتهم بالمشاركة وبكل شي ما عدا الاختبار، وكل هذا بدون إذني، واللي يقهر أكثر إن نظام نور على اسمي، وأنا اللي مسؤولة عن الرصد! حتى دفتر الرصد فيه اسمي.

لما واجهتها قالت إنها عدلت درجتين فقط، لكني تأكدت إنها عدلت درجات ست طالبات. وبعدين عرفت إن بينها وبين المديرة اتفاق مسبق على تعديل الدرجات بدون علمي!

قلت لهم: طيب غيروا الفصول عن اسمي دامكم عدلتوا، ردت المديرة إن الفصول ما تنشال من النظام. طيب ليش أنحط تحت المساءلة؟!

علشان أبرّي ذمتي، كتبت بخط يدي في دفتر الرصد عند اسمي:
"تم تعديل وتغيير الدرجات من قبل المعلمة (فلانة)"، علشان أي جهة ترجع للدفتر تعرف إن هذا مو من شغلي.

التغيير سبب ظلم لبنات كثير، بنات كانوا مراكز أولى نزلوا للمركز الثالث والرابع، وبنات مستواهم ضعيف صاروا بالمركز الأول، وهذا كلّه بدون وجه حق، ولا جهد، ولا اختبارات مكتملة!

اللي زاد شكي، إن والدة إحدى الطالبات معلمة بنفس المدرسة، وشفتها تكلم الزميلة، وبعدها صار التغيير، كأن فيه اتفاق بينهم على تعديل الدرجة!

أنا ضميري مرتاح، أعطيت كل بنت حقها، وزدتهم، وما ظلمت أحد. لكن التغيير اللي صار بدون علمي ظلم لبنات تعبوا وتفوقوا.
أنا برأيي إن فيه مجاملة واضحة لبعض الطالبات، وأنا أبرّي نفسي من هذا التغيير، وأحمل المسؤولية الكاملة لمن قام به