قررت أصفي علاقاتي مع الناس اللي ما يذكروني إلا وقت المصلحة… هل تصرفي كان صح؟
السلام عليكم ورحمة الله وبركاته
جاني وقت حسيت فيه إني وصلت مرحلة لازم أوقف وأراجع كل العلاقات اللي حولي، خصوصًا العلاقات مع بعض النساء اللي كانت تدور فقط حول مصالحهن الشخصية.
أول وحدة كانت تعتبر من أقرب الناس لقلبي، كنت أشوفها مثل أختي.
كانت دايم تتصل تسأل عن أمور تجهلها، معلومات بسيطة أنا أعرفها وأشاركها معها بحب، موّنًا عنها أبدًا. لكن بعد كل مرة أعلمها، تقفل وترجع تختفي. ما في كلام ودي، ما في تواصل حقيقي، بس "أبغى معلومة"، "أبغى مساعدة"، وبس.
استمرت علاقتنا على هالمنوال سنوات، وبعدين فجأة انقطعت سنة كاملة، لا اتصال ولا رسالة ولا حتى سلام. أنا بصراحة قلقت عليها! دورت رقمها، حاولت أتطمن، ما لقيت لها أثر.
مرت السنة، ورجعت تتصل، سألتها: "وينك؟ شصار عليك؟"، قالت: "كانت عندي ظروف"... بس بصدق؟ ما لاحظت عليها شي، كانت تمشي على طبيعتها، ووقتها فهمت إنها ما تكلمني إلا وقت ما تحتاجني.
الشي اللي ضايقني أكثر، إنها كانت تتصل في أي وقت، حتى لو الساعة ٣ الفجر!
ولو ما رديت، ترجع تتصل وتحرق الجوال، ولا كأن فيه احترام للوقت أو تقدير!
فرديت عليها مرة بصراحة وقلت لها: "أزعجتيني!"
قالت: "إنتِ فلانة؟"
قلت: "لا، صفيت علاقتي معها، النوعيات اللي ما تذكرني إلا وقت حاجتها ما تلزمني."
أما الثانية، تعرفت عليها بعد الأولى، وظنيت إنها مختلفة.
لكن أول طلب لها كان غريب: قالت لي "اطلعي لي شريحة باسمك!"
استغربت، وسكت!
المرة اللي بعدها؟ طلبتني أكون كفيلة لها في قرض!
هنا قلت: "لاااااا، سحب!"
قطعت علاقتي فيها بهدوء، وصارت تحاول تتواصل، بس تجاهلتها.
والحين، بعد كل اللي صار، جلست مع نفسي وسألتها:
"لمتى أعطي وأعطي وأعطي، وآخر شي ألقى قلوب ما تذكرني إلا إذا احتاجت؟"
أنا ما عمري بخلت بخدمة أو معلومة، لكن فيه فرق كبير بين اللي يتواصل معك بحب وبين اللي يشوفك أداة لقضاء مصلحته!
أنا مو ضد إني أساعد، بس أساعد بشي أقدر عليه وبنية طيبة، مو أكون بنك طوارئ للناس، ولا أتلقى اتصالات آخر الليل من ناس أصلاً ما يسألون عني وقت الراحة.
اللي أبي أعرفه منكم:
هل أنا صح إني قررت أصفي العلاقات هذي؟
هل من الخطأ إني أقول "كفاية استغلال"؟
وهل فعلاً أنا أبالغ؟ ولا فعلاً في ناس لازم نوقفهم عند حدهم؟
شاركوني رأيكم بكل صراحة، لأني فعلاً ارتحت بعد ما صفيت العلاقات… بس حابة أسمع وجهات نظر ناس عاشوا تجارب مشابهة 💔
ليست هناك تعليقات:
إرسال تعليق