غيرتي قاعدة تقتلني… خطيبي شاف بنت صدّرها طالع وصرت أحس إني انكسرت من جوا 💔
السلام عليكم بنات،
أنا حبيت أفضفض، لأن قلبي واجعني جدًا، وحاسة نفسي عم بموت كل يوم من كتر التفكير والبكاء والغيرة اللي خرجت عن سيطرتي.
أنا مخطوبة لشب بيعيش في تركيا، وإحنا عن حب، متفقين نتزوج في صيف 2023 إن شاء الله، وهو إنسان بيحبني وأنا كمان، وكل الناس بتحكي قديش هو محترم وبيخاف عليّ.
بس…
في مشكلة وحدة عم تدمرني، وهي غيرتي المجنونة، صرت أغار عليه من كل شيء.
أغار عليه من البنات، من لبسهم، من كلامهم، من نظراتهم، حتى من الشارع اللي بيمشي فيه، من السوق، من المحلات… كل شيء.
وصلت إني طلبت منه يشتغل في مكان بعيد، بس عشان ما يشوف بنات.
وهو سمع كلامي، وصار يشتغل بريف، بعيد عن الناس، يعيش وحده، ما بيختلط بأحد، حتى الطلعات صرت أعرقلها، خصوصي بالصيف، لأنه البنات بتركيا، ما شاء الله، لباسهم مفتوح جدًا، والشوارع مليانة جمال وأنا من وقت ما زرت تركيا وشفت البنات هناك، اختنقت بغيرتي.
ومع هيك، مرت فترة كنا مرتاحين، هو بالريف، وأنا مطمئنة.
بس من فترة، أجوا أهله لعنده وصار يطلع معهم، وبوقتها أنا حسيت الدنيا بتوقع فوق راسي، اتخنقت من القلق، من الغيرة، من الخوف.
صارت بيني وبينه مشكلة، واتهمته إنه أكيد شاف بنت وعجب فيها،
وفرمتت جهازه من كثر ما عصبت…
وهو جهازه خرب، وبقيت طول الليل أنهار وأبكي وأتخيل أسوأ الأشياء…
ثاني يوم راح يصلح الجهاز، وراح على المركز اللي عقدنا فيه،
ولما حكالي وين راح، بلشت أسأله مين شاف؟ شو شاف؟
وقال لي كلمة ذبحتني…
قال لي:
"أنا حاولت أغض بصري، بس وقفت جنبي وحدة لابسة شورت وتوب وصدرها كله طالع، والشيطان غواني واتطلعت فيها شوي".
بنات…
أنا متت وقتها…
كأني انكسرت كسر ما يتصلّح.
مش لأنه شاف، بس لأني أنا اللي حبيته ومنعته يطلع وأبعدته عن الناس،
وأول ما طلع… شاف… وأنا حاسة إني فشلت بحمايته من الفتنة 😞
أنا مش قادرة أنسى، ولا أتجاوز الموقف.
كل يوم أبكي، كل لحظة أتخيله يتطلع فيها،
أفكر: "أكيد أعجبته"، "أكيد شاف شي ما شافه فيني"، "أكيد قلبه اهتز"…
وهو بيحلف إنه ما حس شي، وإنه فعلاً الشيطان وسوس له لحظة،
بس ولا تحركت مشاعره، بس اتفاجأ، هذا كل اللي صار.
وإنه ما زال يحبني، وواقف معي، وسمع كلامي وابتعد عن كل شي، وساكن بالريف لحاله.
بس أنا مش قادرة أوقف التفكير، مش قادرة أنسى المنظر اللي تخيلته،
صرت بس أتمنى ما يطلع، ما يروح، ما يشوف شي…
صرت أحس نفسي بمسؤولية فوق طاقتي، ومسؤولة عن غض بصره، وكأني أنا لازم أحجبه عن العالم.
ساعدوني بنات، بالله عليكم،
– كيف أتجاوز هالموقف؟
– هل طبيعي إنه ينفتن بلحظة؟
– هل أنا غلطانة إني أحاول أحميه بهالطريقة؟
– كيف أقدر أعيش بدون ما أختنق كل مرة يفكر يطلع؟
أنا مش مجنونة، أنا بس بحبه بزيادة… بس الحب لو زاد أحيانًا ممكن يوجع أكتر من أي كره 💔
ليست هناك تعليقات:
إرسال تعليق