أنا وحده متزوجة من 11 سنة، عايشة في أمريكا، وما أنزل ديرتي إلا كل أربع أو خمس سنين، مو لأن ما أحب البلاد، بس عشان زوجي ما يبغى، أو بالأصح، ما يحب يصرف.
زوجي بخيل، بخيل فـ كل شي. لا كلمة حلوة، ولا اهتمام، ولا حتى احترام. دايمًا ساكت، بس ما يسكت عن مراقبتي، يعرف كل شي عني، وحتى لو سكت، يسجل كل شي في مخه. كنت قبل أتكلم، أحكي، أفضفض، وأشاركه كل شي... واليوم صرت أتعلم أصمت مثله، وما أقول إلا الضروري.
المشكلة الأخيرة اللي كسرتني، صارت من كم يوم، كان يكلم أمه بالفيديو، وبعدين عطى بنتنا تحكي معاها، وأنا قلت خل أجرب وأسلم عليها وأسأل عن حالها وحال البنات، فجأة أخذه التيلفون مني وقال: لا تحكين معاها!
طلع للبلكونة، وسمعته يقول لأمه: "لا تسولفين معاها، هي تعرف كل شي عني، وما تسولف لي شي عن أهلها". وكأنه يقول لها: ترى زوجتي خائنة للخصوصية! مع أنه هو عارف أني ما أسولف لأحد، حتى أمي اللي مريضة ما تعرف عن معاناتي شي، وما أحب أثقل عليها.
زوجي بخيل ماديا وبالأكل وش أسوي؟
كنت مصدومة، متفاجئة، وقلبي احترق. قلت له: ليش؟ إنت تعرف كل صغيرة وكبيرة عني، وتسولف دايمًا لأبوي وخالي، وأنا؟ حتى أمي ما أسمح لنفسي أزعجها. بس للأسف، كلامي ما هز فيه شي. هو إنسان منطوي، ما يحب أهله، منقطع عنهم من ٧ سنوات، واليوم بس رجع يكلمهم، وعلى طول راح يحذرهم مني.
طلبت الطلاق ولا علمته السبب !!!
أنا ما أحب أتكلم عن مشاكل زوجي مع الناس، بس لازم أقول الحقيقة: هو إنسان ما يعطي، ما يحب، ما يقدّر، وإذا سألتيه شي، دايمًا يجاوبك بجفاف، أو يقلب الموضوع عليك.
لكن الصراحة؟ أنا اليوم غير. من بعد ما سمعت كلامه، قررت أوقف. قررت أكون مثله، أسولف بالمختصر، وأبطل أكون الشفافة اللي كان يستغلها عشان يعرف كل شي، صرت غامضة معاه خله يتعب ويموت من التفكير بدال ما يدمرني بشكوكة وفضوله.
رسالتي لأي وحدة تمر بنفس اللي مريت فيه؟ لا تكونين كتاب مفتوح مع إنسان يقلب كل شي ضدج. تعلمي إنج تحمين نفسج، تحمين خصوصيتج، ومو دايمًا تكونين الصادقة الوحيدة في علاقة كلها صمت وشك. إذا ما كان شريكج سند، لا تسمحين له يكون عبء فوق طاقتش.
ليست هناك تعليقات:
إرسال تعليق